Reykjanesbær er ekki eini bærinn á Suðurnesjum

Eitthvað hefur Þóra Kristín nú ruglast í ríminu við gerð þessarar fréttar því hún talar í sífellu um ástandið á Suðurnesjum, þegar þessi frétt fjallar augljóslega eingöngu um Reykjanesbæ.

Hálfkláruð hús og draugahverfi

Hvernig geta þeir gagnrýnt bíómynd?

Ég skil ekki alveg fyrirsögnina á þessari frétt. Hvernig ætlar blindur maður að fara að því að gagnrýna eitthvað sem hann ekki sér. Hvað næst, ætla heyrnalausir að fara að gagnrýna tónlist?

Blindir gagnrýna nýjustu mynd Julianne Moore

Bernie Mac

Blessaður kallinn bara dáinn, jæja, þá þarf ég amk ekki að óttast það að hann framleiði fleiri Bernie Mac Show. Hvílíkur og annars eins horbjóður.

 

Ps. Hvernig stendur á því að teljarinn á þessari síðu fer alltaf niður í næstum núll? Er mbl á móti síðunni minni og skafa því af heimsóknartölunni svo að síðan fari nú pottþétt ekki á forsíðuna? Ég er sannfærður um að svo sé.

It's not paranoia if they're really out to get you.

Bernie Mac látinn

Heyr heyr Geir!

Mikið er ég ánægður að lögreglan á Íslandi sýndi loksins að hún er með pung og gerði það sem ég borga fyrir með skattpeningunum mínum. Það er til lítils að borga endalaust undir lögguna ef þeir ætla svo bara að eyða öllu púðrinu í pissandi fyllibyttur í miðbænum en sitja hjá aðgerðarlausir á meðan óhefðlaðir barbarar vaða uppi með skrílslæti óáreittir. Það var kominn tími til að sýna þessum „friðsömu“ mótmælendum hvar Davíð keypti ölið.

Ég verð nú að játa að mér brá eilítið þegar ég sá að óeirðalögreglan var mætt á svæðið, grá fyrir járnum. Mér brá reyndar mest því ég vissi ekki einu sinni að við ættum svona öfluga sveit, en mér brá líka því ég hélt að þarna væri örlítið overkill í gangi. En það er víst lögreglunnar að meta hvernig best sé að bregðast við ástandi sem þessu hverju sinni, og ef að þeir ákveða að það þurfi að kalla út óeirðasveit, þá verða menn bara að gjöra svo vel að halda sig á mottunni.

Allt tal um valdníðslu lögreglunnar á ekki við í þessu máli. Ef að lögreglan biður þig um að færa þig af Þjóðvegi eitt þar sem þú ert að teppa umferð þá færiru þig og ekkert múður. Ef þú hefur eitthvað við það að athuga geturu komið kvörtunum þínum á framfæri seinna, þegar þú ert búinn að færa þig. Sumir tregir mótmælendur virðast hins vegar líta á það sem einhverskonar ögrun ef að lögreglan beitir þeim tólum sem hún hefur yfir að ráða, og þess vegna sé það besti kosturinn að hjóla í þá. Lögreglan fær alla mína samúð að þurfa að fást við svona bjána. Mótmæli eru ekki friðsöm ef veist er að lögreglu. Hvað sem hver segir um valdníðslu og óþarfa hörku af hálfu lögreglu þá þarf jú alltaf tvo í tangó.

Fyrir mitt leyti þá er ég fyrir löngu kominn með alveg upp í kok á þessum helvítis mótmælendum og þeir fá enga samúð frá mér. Þeir brjóta lög trekk í trekk en spila sig svo sem fórnarlömbin í þessu máli. Það varðar við lög að raska umferðaröryggi og það gera þessir menn sig seka um aftur og aftur. Bíðum bara og sjáum hver verður fórnarlambið þegar einhver deyr vegna þess að öll umferð var stopp og sjúkrabíllinn sem átti að flytja þann aðila á sjúkrahús kemst ekki leiðar sinnar.

Margir tala um frelsissviptingu í þessu samhengi, sem sé að vörubílstjórarnir séu að halda mönnum í gíslingu með þessum lokunum sínum. Aðrir blása á slíkar fullyrðingar og segja að „þó að þú sért 15 mínútum lengur heim úr vinnunni þá er ekki verið að svipta þig frelsinu.“ Er það þá sem sagt tímalengdin sem skiptir máli þegar menn eru sviptir frelsinu? Er allt í lagi að loka menn í fangelsi svo fremi sem það telur ekki meira en X marga klukkutíma? Er það bara töf en ekki frelsissvipting? Ég veit það a.m.k. að ég var alveg brjálaður þegar ég sat fastur í hálfa klukkustund í Garðabæ og var klukkutíma á leiðinni heim í stað hálftíma. Ef að ég hefði verið með Emilíu grenjandi í aftursætinu hefði ég sennilega púllað Michael Douglas á þetta í Falling Down.

Að lokum, þá vil ég ekki að neinn misskilji það sem ég er að segja. Ég hef svo sem ekkert á móti þessum mótmælum. Mér finnst bensínverð vissulega svívirðilega hátt. Ég kæri mig hins vegar ekki um að þessi mótmæli bitni á mér, né öðrum sem hafa ekkert með þetta blessaða bensínverð að gera. Það lækkar lítið bensínverðið að ég mæti of seint í vinnuna, eða einhver missi af flugi, læknir komist ekki í aðgerð og þar fram eftir götunum. Það eina sem það gerir er að vekja gremju hjá mér og flestum öðrum.

Ég held að það væri ráð að fara og leggja bílnum sínum fyrir framan innkeyrslurnar hjá þessum bílstjórum, og leyfa þeim aðeins að smakka á eigin meðali. Reyndar held ég að það skipti kannski litlu að svo komnu máli þar sem þeir eru flestir ekki að flýta sér neitt, það er nefnilega búið að reka þá.

 

Lögregla brást rétt við

Hámark kaldhæðninnar?

Það er alveg ótrúlegt að heyra samhliða fréttir af mestu rigningum í háa herrans tíð í Englandi og um leið að það sé vatnsskortur. Hversu pirraðir ætli að Tjallarnir séu? Allt vatn heimsins virðist vera að safnast saman í landinu en samt er ekki hægt að drekka það. Þetta er eflaust svipuð tilfinning og að deyja úr þorsta úti á sjó. Hvað ætli gerist næst, kaffiskortur í Brasilíu?

Hundruð þúsunda Englendinga verða brátt án neysluvatns og rafmagns

Svona fer fyrir þeim...

Já krakkar mínir, svona fer fyrir þeim sem reyna að bora göt á kvótakerfið.

Einar Oddur Kristjánsson látinn

Erlendir iðjuleysingjar, lítið ykkur nær!

Eins og alþjóð er kunnugt um er mér einkar illa við alla trjáfaðmandi hippa. Verknaðurinn sjálfur, þ.e. að faðma tré, fer sem slíkur ekkert sérstaklega í taugarnar á mér, heldur þær persónur sem búa að baki þessum þorskshausum. Þessir meintu náttúrunnendur sem bera víst hag okkar allra fyrir brjósti eru í langflestum tilfellum miðbæjarrottur sem hafa jafnvel aldrei komið út fyrir borgarmörkin. Þeim stendur nákvæmlega á sama um náttúru landsins og hafa aldrei heyrt um staði eins og Kárahnjúka, hvað þá komið þangað, fyrr en Ómar segir þeim frá þeim. Mér þykir þetta vera hræsni á hæsta stigi.

En nú hefur steininn endanlega tekið úr. Ég get svo sem alveg skilið íslenska mótmælendur og náttúruunnendur, jafnvel þó að þeir hafi ekki látið í sér heyra fyrr en of seint, en þegar einhverjir erlendir iðjuleysingjar mæta hingað til landsins til að mótmæla framkvæmdum og stóriðju verð ég að segja stopp. Það er ekki bara hræsni, heldur líka frekja og dónaskapur. Hvern andskotann varðar þetta fólk um hvað við gerum við okkar land? Hundskist bara heim til ykkar og takið til í ykkar eigin saurugu bakgörðum og leyfið okkur að ákveða sjálf hvað er okkur fyrir bestu.

Svo hlýtur málstaður þessa fólks ekki einu sinni hljómgrunn hér á fróni. 40 manns í mótmælagöngu! Þótt við Íslendingar séum nú ekkert sérstaklega margir þá er 40 ekki mikið, jafnvel þó við miðum við höfðatölu. Svo til að kóróna þennan fíflagang þá tókst mótmælendunum að brjóta lög og láta handtaka sig. Að vísu var glæpurinn kannski ekki sá alvarlegasti en hér erum við að tala um prinsipp mál, glæpur er alltaf glæpur. Er ekki full lagaheimild fyrir hendi til að vísa glæpamönnum úr landi? Að minnsta kosti þótti ástæða til að vísa Austur Evrópskum harmonikkuleikurum úr landi sem lífguðu uppá grámyglulega höfuðborgina með lifandi dragspilsleik og glaðlegu fasi, og ekki voru það nú stórglæpamenn. Æj nei, þeim var víst ekki vísað úr landi, þeir voru aðstoðaðir við að komast heim til sín. Er ekki kominn tími til að aðstoða þetta fólk heim líka?

Fjórir handteknir í mótmælum Saving Iceland